هل الانسان مصير ام مخير وهل تساعد البيئة المحيطة على تكوين وتحديد المستقبل؟!!

كتبت/ بسملة محمود حسن

اخدنا في الدراسات الاجتماعية زمان ان البيئة هي ما نؤثر به ونتأثر به، لكن تأثرنا في اشكالنا بس ولا في اشكالنا وطباعنا؟!

علميا في الاتنين، عمليا بقي مش شرط.

البيئة ممكن تأثر في اشكالنا ولون بشرتنا وطولنا ولهجتنا، لكن مش شرط انها تأثر علي طباعنا واخلاقنا.

مثلا شخصية ابن رجل الأعمال اللي عنده إمبراطورية عظيمه اللي (بتصدرها لينا السينما او الدراما) انه بيكون فاسد وبيسهر في البارات، علي الجهه التانيه بيكون ابن العامل البسيط مثال يحتذي به في الخلق والتعليم.

مع ان بحسبه بسيطه ابن رجل الأعمال عنده الفرصه انه ينجح اكتر من ابن الموظف البسيط، بعيد انها اسلوب ونهج حياه عند مؤلفيين المسلسلات والافلام، لكن هل ده الواقع؟

هل ممكن يكون شخص متوفر له كل سُبل النجاح ويُصر انه يكون فاشل، وشخص متوفر له كل سُبل الفشل ويكون ناجح؟

يعني عادي يكون ابن الدكتور فاشل، وابن الضابط سارق، وابن الموظف يكون مدير مؤسسة مش بس موظف؟!

اه، ممكن، لأنه مش قانون طبيعة عشان ينفذ بالحرف، حتي قوانين الطبيعة لها افعال شاذه عن القانون الأساسي، فـما بالك قانون عادي مش اساسي!!

الانسان بطبعه متقدرش تحطه في اطار معين وتقول هيتصرف بالطريقه كذا وكذا، في انسان معارض بطبعه، وفي انسان بيفكر خارج الصندوق، بعد حوالي 10000 سنه لازال ابناء ادم وحواء لا يجتمعون علي فكره واحده، او يدعمون نفس الرأي.

اللي عايز ينجح بينجح لو تكاتفت ضده الظروف، واللي عايز يفشل بيفشل حتي لو حالفته جميع الحظوظ.