متبقيش فاطمة.....

كتب :- بسملة محمود

فكرة المقال بتراودني من حوالي 4 شهور، بين اني اكتبها واقوم بواجبي وانبه البنات وبين اني أقول وانا مالي اللي عايز يعمل حاجه يعملها، لكن بصراحه غريزتي كأنثي واجب تحذر اختها الانثي غلبتني وروح رضوي الشربيني تقمصتني....

مين هي فاطمه اللي بتكلم عليها؟!

في مسلسل عربي مصري قديم اسمه (مين ميحبش فاطمه) حرفيا اما سمعت المسلسل اتأكدت ان مفيش حد ممكن يكره فاطمه، البنت النمساويه (دي جنسيتها) الشقراء اللي حرفيا تقول للقمر قوم وانا اقعد مكانك اللي قامت بيها "شيرين سيف النصر"، بنت جدعه حرفيًا من اللي بيتقال عليهم ست بـ100 راجل، بجد يا حظ اللي سمع المسلسل ويا حظ اللي مسمعش المسلسل (لو انتِ بنتنا ضد ظلم المراة عموما انصحك بلاش تسمعيه عشان متولعيش في أنكل احمد عبدالعزيز)........

عملت ايه فاطمه؟!

عِد معايا يا مؤمن..

1_ حبت الشاب المصري اللي ساكن عندها في البانسيون واتجوزته (رغم انها تعرف انه كان متجوز وعنده بيبي بنوته).

2_أجبرت والدها يشغله عنده في المصنع بمرتب مكنش يحلم بيه.

3_تخلت عن ديانتها وأشهرت اسلامها عشان خاطر زوجها يقبل يجيب بنته النمسا 🇦🇹 عشان تربيها (بعد وفاة زوجته الاولي في حادث انهيار عماره وتيتم البنت).

قد يكون دا عادي جدًا، لكن بنتنا متسكتش

4_ بعد رفض زوجها انه يجيب بنته للنمسا وانه يفضل انها تتربي مع ماجده (الاكس بتاعته) بحجه ان ماجده عربيه مسلمه هتربي بنته علي التعاليم الاسلاميه العربيه الصحيحه (شالله يا تعاليم) قررت بطوط انها مش هاين عليها تحرم جوزها من بنته وقالتله أنها موافقه يتجوز ماجده وكده كده الدين بيسمحله بـده وهي معندهاش مانع وقالتله بالحرف أنا اتجوزتك وانت في حياتك واحد تانيه مش فارقه اسمها تهاني ولا ماجده (روح رياضيه عاليه يبنتي والله) طبعا الباشا م صدق وراح مصر اتجوز ماجده وجابها للنمسا تعيش في بيت فاطمه (أخلاقك عاليه اوي يبني والله).

ايه كان جزاء بطوط بعد دا كله؟!

أولا زوجها السيد الفاضل قبل اشهارها اسلامها كان رافض فكره ان بنته تتربي معاها بحجج اشك اذا كان هو فعلا مقتنع بيها، فرضًا لو فاطمه كانت خلفت بنت هل كان هيديها لـماجده برضو عشان تتربي علي التعاليم العربيه الاسلاميه ؟!

حتي بعد م اشهرت اسلامها فضل رافض الفكره دي مع ان يعتبر نص السكه قصرت +انه هو شخصيا معترف ان فاطمه اخلاقها تشبه اخلاق العربيات وملهاش في جو الاجانب دا خالص..

ثانيًا م صدق انه يجري علي الاكس بتاعته أول م قالتله فاطمه (طب يسيدي استني يمكن البت ترجع في رأيها طيب) راح واتجوز ماجده وجابها تعيش في بيت فاطمه اللي اشترته بفلوسها..

ثالثًا بعد كل التضحيات دي لما اتحطت ماجده وفاطمه في مواجهه بكل سهوله اختار ماجده ونسي كل تضحيات فاطمه عشانه (القانون في النمسا بيمنع الزواج الثاني خصوصا لو الاولي نمساويه رغم ذلك خاطرت فاطمه وقبلت أنها تخليه يتجوز واحده تانيه في حين انها متأكده ان في أي لحظه ممكن تتحبس عشان تسترت علي الجريمه دي) ولما والدها هددها انه هيبلغ الحكومه النمساويه بـده راحت للباشا و وقعوا علي عقد طلاق بتاريخ قديم قبل تاريخ زواجه من ماجده عشان تحميه من السجن (رضوي الشربيني لو مسكتك مش هترحمك)

وبعد دا كله وانه واطي وحقير سابت بلدها النمسا يتمتع فيها الباشا هو وماجده وبنته وقررت تسافر أي مكان تاني مفيهوش استاذ صبري .......

فاطمه أستفادت ايه؟!

فاطمه حرفيا خسرت كل حاجه، خسرت بيتها، وفلوسها، و والدها، وبلدها، وشخصيتها، وكرامتها، واحترامها لذاتها، وحقها كأنثي في حبيبها...

متضحيش جامد عشان راجل، الراجل كده كده بيعمل اللي في دماغه سواء ضحيتي عشانه او لا، لو انتِ من اللي في دماغه حرفيا هيهد الدنيا بس عشان يكون معاكي، ولو انتِ مش في دماغه والله لو طلعتي ارنب من الطاقيه مش هيعبرك...

قالها فارس قطريه (رضوي الشربيني مبتسميش علي صنف الرجاله القلاب) وهما صنف قلاب فعلا مش كلام في قصيده.

الراجل عموما عقلاني اوي، والست في المطلق مضحيه أوي عشان اللي بتحبه، الثنائي اللي فيه طرف عقلاني وطرف مضحي دا ثنائي عبارة عن جحيم.

حبي وضحي وقدري مش بقولك لا، بس في حد يستاهل تعملي دا عشانه وفي حد ميستاهلش تقولي له صباح الخير بوش مبتسم....

تستاهلي حد يشوفك انتِ بس ميشوفش غيرك، حد مستحيل يفكر انه يبقي مع غيرك مش يستغل كل فرصه تبعده عنك، تستاهلي راجل زي م هتضحي عشانه يضحي عشانك وزي م نفسك يبقي مبسوط يبقي نفسه تبقي سعيده وفرحانه...

متقبليش بأقل مما تستاهلي عشان نهايتك متبقاش زي فاطمه، ومتبقيش فاطمه......