لو حضارتنا انهارت هل فى حاجة تثبت اننا كنا موجودين و لا هنبقى بلا أثر ؟

"الصندوق الأسود لكوكب الأرض"

كتبت/ ميسرة محمود

مجموعة من علماء وكالة ناسا قرروا انهم لازم يوصلوا لحل يخلد وجودنا للأبد و يكون دليل بالصور و الصوت و معظم اللى موجود على كوكب الأرض و عشان كده الحل كان في " التسجيلات الذهبية التى توجد داخل مسبار Voyager 1"

مسبار ڤوياجر هو مسبار امريكى انطلق للفضاء 5 سبتمبر 1977 (اكثر من 45 سنة) منطلق في الفضاء بسرعة 17 كم/ثانية و دى أكبر سرعة لمركبة فضائية فى التاريخ؛ ليسافر بطول المجموعة الشمسية و يجمع معلومات دقيقة عن كل كواكبها ثم يخرج إلى الفضاء الخارجى .

مسبار فويجار اتعمل عشان مهمتين أساسيتين

الأولى: يمشى في مسار محدد للكوكبين زحل و المشترى و يكشف خصائهم و يجمع عنهم معلومات و بالفعل أرسل لهم صور و اكتشف ان البقعة الحمراء اللى بتظهر على سطح كوكب المشترى هى عاصفة عملاقة فائقة السرعة .

الثانية : حفظ التسجيلات الذهبية (Golden records) لملايين السنين

"الصندوق الأسود لكوكب الأرض"

فى الأول تعالوا نشرح أى دى بالظبط

التسجيلات الذهبية عبارة عن لوحة معدنية مطلية بالذهب منقوش عليها بيانات و معلومات عن البشر و عن موقع كوكب الأرض فى الكون

جوة اللوحات دى بقا فى اسطوانات فونوجرافية متسجل عليها 115 صورة بيظهر فيها شكل الحياة علي الكوكب الأرض اللى احنا عايشنها عاملة إزاى و شكل لكل أنواع الكائنات الحية و صور الفن المعماري و صور للأشغال و الوظايف اللى بيقوم بيها الناس و صور كتير من أماكن كوكب الأرض زى وادى النيل من القمر الصناعى و صور لشكل الكوكب من برة و لباقى كواكب المجموعة الشمسية ، و اللوحات (التسجيلات الذهبية) فيها رموز و حسابات رياضية عن الحجم و الزمن و الكتلة و مقادير فيزيائية كتير تانية و لوحات تانية بتبين المركبات الروابط الكيميائية ؛ وطبعاً كل ده متفسر و متعرف بطريقة بسيطة معتمدة على قوانين فيزيائية ثابتة يقدر يفهمها أى إنسان فى مختلف الأوقات و الأماكن .

اجزاء تانية من اللوحات متسجل عليها التحية بأكثر من 55 لغة منهم اللغات القديمة و المنقرضة، و متسجل أصوات الكائنات الحية علي الأرض زى الإنسان و الحيوان و كمان أصوات الطبيعة و أصوات الرعد و البرق .

80% تقريباً من التسجيلات عبارة عن مقطوعات موسيقى مختلفة زي الكلاسيكية منها الشرقية و الغربية و تسجيلات نادرة لبيتهوڤن و باخ و غيرهم (اكتر من 90 دقيقة)

قامت Ann Druyan (واحدة من فريق مشروع فويجار ) بتسجيل تسجيل مدته ساعة كاملة بتتكلم فيه عن موضوعات كتير مختلفة زى تاريخ الأرض و الحضارات البشرية و المشاكل اللى بتواجهنا على الأرض و عن إحساسها و هى أول مرة تقع فى الحب.

بس الحاجة الغير متوقعة ان مسبار voyager 1 انه فاق التوقعات و مكتفاش بالمهمتين دول بس بل بالعكس كشف أسرار ملهاش حصر ساعدتنا نفهم نظام المجموعة الشمسية بشكل أوسع و كمان قدر يكون اول جسم من من تصميم البشر وصل لأطراف المجموعة الشمسية و قدر يوصل للفضاء البين نجمى المعروف ب ( Interstellar space).