꧁قدر دعوتك اما تستجاب وافتكر سيدنا ايوب꧂

كتبت :- بسملة محمود

تيجوا نتكلم عن الدعوات اللي بنرجع فيها؟

ايه ده هو في دعوات بنرجع فيها؟

تعالوا نشوف 🤷🏻‍♀️

رجوعنا عن الدعوات نوعين،

نوع لفظي ونوع فعلي.

مش هطول عليكم وهدخل في الشرح عشان انا عارفة خلقكم ضيق ☺️

الرجوع اللفظي في الدعاء:

بيكون مثلا اما بتدعي ان ربنا يقرب منك حد وفجأة تلاقي الحد ده مستحيل تعيش معاه في اي دور في حياتك، هنا علي طول بتقول (لأ يارب مش عايزة) علي اساس انه اوردر هيتلغي وكده،

أو بتقابل دعواتك القديمه بدعوات جديدة عكسها، بمعني تدعي ان ربنا يبعد الشخص عنك بدل ما كنت بتدعي إن ربنا يقربه منك، نفس الشيء عن الوظائف، والحالات الماليه والاجتماعية،

يعني تلاقي البنت من دول بتقول يارب اتجوز، في حين تلاقي صاحبتها اتجوزت واتبهدلت وشالت المسؤولية تقول (لأ خلاص مش عايزة) علي أساس إن الجواز بيوزعوا فيه بنوبون 😂

وهكذا...

اما النوع التاني وهو الرجوع الفعلي:

دا بيكون بأفعالك اللي مضاده لكل اللي كنت بتقول إنك هتعمله اما تستجاب الدعوة،

يعني تلاقي ناس ربنا اخر الذرية معاها شويه، تقوم تدعي ربنا انها لو ربنا كرمها هتبقي ام/اب كويس ومش هتعمل اي حاجه تضر الطفل وهتحاول تربية بطرق سليمة، أول ما يجي الطفل الشبشب يترفع، تقريبا في علاقه طرديه بين الاطفال والشباشب، وياريت تيجي علي الشبشب، دي يبقي تنمر لفظي ودعوات من نوع (ربنا ينـتـقم منك _ أنت ايه مش بتـتهد ربنا يهـدك يا اخي جننتني _ جاتها نيلة اللي عايزة خلفه) علي اساس انها كانت عايزة برجر قبل كده!!

نفس الشيء في الوظائف، تفضل تدعي ربنا وتقول ياااارب ارزقني بالوظيفة الفلانيه، اول ما ربنا يستجيب لدعوتك، تتكاسل عن الوظيفة وتفقد شغفك ناحيتها.

نفس الشيء اما تتجوز الشخص اللي بتحبه، وكنت بتدعي ربنا في كل صلاة انه يكون من نصيبك، بتبدأ تشوف فيه حاجات غريبة، مع إنك كنت شايفها قبل كده بس بتمثل انك مذبهل يا سبحان الله!!

ايا كان اللي دعيت او بتدعي او هتدعي بيه احترمه أول ما يبقي ليك،

ابنك او بنتك اللي دعيت بيهم، اكرمهم وكون حنين معاهم، واما تيجي تدعي عليهم افتكر إنك ياما بكيت لربنا وقولتله ياارب نفسي في طفل، وانك ياما قولت للناس انا نفسي في ظفر عيل، واما يجي العيل تدعي عليه!!!!

وظيفتك اللي دعيت بيها، اتقنها وحاول إنك تكبر فيها، اصلها برضو نفس الوظيفة اللي كنت بتحسد كل اللي بيشتغلوا فيها وتقول ياريتني زيهم، ويوم ما تبقي زيهم تبقي مهـمل!!!

حبيبك أو حبيبتك اللي دعيت بيه/ا، راعيهم ومتبقاش ناقم علي دعوتك المستجابه، متبقاش عدسة مكبره لعيوبهم اللي أنت كنت شايفها قبل كده بس بتستهبل، افتكر ان دا/دي الشخص اللي كنت بتدعي بيه/ا انك اما تصحي من النوم تلاقيهم جمبك، واما ربنا يستجاب تبقي مش عايز تشوفهم حتي!!!

علي فكره مش معني إن الدعوة استجابت، انها هتكون حاجات دايمه في حياتك، فتهملها زي ما أنت عايز وتقول انها كده كده مضمونه ودايمه، لا يا بابا غلط،

ابنك او بنتك ممكن يمـرضـوا لا سمح الله ويبقوا اتهدوا فعلا وتبقي بتتمني انهم يتعـفرتوا تاني،

وظيفتك ممكن يطـردوك منها عادي جدا وترجع عـاطـل، او يجي شخص يقدر الوظيفه فياخدها منك وساعتها تستقيل، وساعتها هتتمني إنك مكنتش تهمل في شغلك،

شريك الحياه، ممكن تنفصلوا عادي يعني مش أول ولا اخر ناس، أو يتـوفي وساعتها هتندم علي كل لحظه ضيعتها.

افتكروا انكم محاطين بحاجات كنتم بتزنوا زي الاطفال علي ربنا عشان يستجيب و يوهبها ليكم، متبقوش زي الاطفال برضو وترجعوا في كلامكم، وتبدأ تشكي لربنا من حاجه انت دعيته بيها.

سيدنا ايوب، كان اغني من في قريته وكان عنده الذرية وكان عنده الصحه، أول ما تعـب،وخـسر اولاده وفلوسه، مـجريش علي ربنا وقاله لا يارب مش هستحمل رجعلي كل حاجه تاني، مع إن في ناس كتير طلبت منه انه يدعي واكيد ربنا هيستجيب له عشان دا نبي، لكنه استـحي من ربنا، استـحي انه يزعل علي حاجات ربنا رزقهاله من غير ما يطلبها منه وكان عنده حسن ظن بالله، واما فاض بيه بعد وقت طويل، قال لربنا (ربي إني مسني الضر وأنت ارحم الراحمين)، يعني معتبش علي حظه وقال ياااارب ليه نحستني واخدت ولادي وبيتي ومالي، لأ كان حتي في دعوته مستحي وبيقول يارب أنت ارحم الراحمين.

اما دعوتك تستجاب استـحي من إنك تشكي لربنا منها علي اتفه الاسباب، وافتكر إنك انت اللي دعيتها قبل كده، وافتكر إنك من غير الدعوة دي كانت نقصتك حاجات كتير.

قدر دعوتك اما تستجاب، عشان ربنا ميسحبهاش منك وترجع تدعي بيها تاني.