سبيروسباتس أصل الغازوزة فى مصر رجعتنا لأيام زمان

بعد انتشار المقاطعة للمنتجات اللى بتدعم العدو و اتجاهنا للمنتجات المصرية ظهر التريند الجديد و هى "غازوزة سبيروسباتس" 

كتبت/ ميسرة محمود

فى الاول خلونا نعرف أنها غازوة عشان جاية من (مياة غازية) مش كازوزة 

تعالوا نحكى تاريخ سباتس من الاول خالص

الخواجة نيكولا سباتس كان في معمله في إسكندرية و قرر يخترع مشروب غازى زى اللى بيشوفه برة مصر فاخترع (ليمونادة سباتس) سنة 1909 و بعدها سبيروسباتس (يونانى) جه مصر يكمل دراسته و يشتغل مع عمه نيكولا في المعمل و بعدها قرر يفتح مصنع سنة 1920 عشان يكمل مسيرة عمه وغير اسمه وسماه" سبيروسباتس" و نتج طعمين بس و هما التفاح الأحمر و الليموناده و كانت أول مياة غازية تنزل مصر .

و كان اللوجو عليه "نحلة" مش دبانة و النحلة دى عشان كان سبيروسباتس بيشتغل فى منحل فى جزيرة سيفالونيا.

 و كان سباتس كل شوية ينزل بأطعمة جديدة و غريبة يجربها عشان يشوف إقبال الناس عليها منها الرمان و Tonic water و grape fruit و جنزبيل لكن ثابت معاه تفاح أحمر و ليموناده . 

و كان وقتها كان بيشتغل بالمصنع حوالى 150 عامل و بيملك 20 عربيه لتوزيع المنتجات في كل مصر و ده كان ساعتها أرقام كبيرة جداً.

انتشرت سباتس لحد ما وصلت للقصور الملكية و الطبقات العليا و حصلت على المركز الأول على 56 مصنع منافس فى المعرض النوعي الثاني للصناعات سنة 1941 و الذي سلم الجائزة  سبيروسباتس هو الملك فاروق الأول شخصياً .

وفي سنة 1998 تم التنازل عن الشركة والعلامة التجارية لما قرر عطوان بخيت صاحب شركة سابسا للمشروبات الغازية أنه يشترى سبيروسباتس بشرط انه يفضل المنتج هو هو حتى اللوجو و الاسم و فضل المنتج فى السوق لحد سنة 2015 عندما توفى طلعت عطوان بخيت و اخوه و تم غلق المصنع و لكن فى سنة 2019 الناس ابتدت تفتكر و تسأل فين سبيروسباتس و كمان ابتدت المنتجات المصرية تنتشر و انها الوحيدة اللى إنتاج مصري 100% فقرر مينا و يوسف أولاد طلعت عطوان بخيت انهم يرجعوا للسوق تانى و عملوا بيدج على الفيس بوك و بدون أى ماركتنج الصفحة اتنشرت والناس ابتدت تسأل على سبيروسباتس و عملوا خطوط إنتاج جديدة و غيروا شكل الازازة البلاستيك مش زجاج زى زمان.

و فى 2023 عندما قامت الملحمة ضد اخواتنا فى فلسطين قررنا مقاطعة منتجات العدو الإسرائيلي و الأمريكي و أى منتج يتبع دولة تدعم العدو الإسرائيلى و نشجع المنتجات المصرية فأصبحت سبيروسباتس التريند و الشعب بقى بيدور عليها فى كل مكان .