(زوجة واحده من شارع الهرم لا تكفى)

اخر سنتين كان الخلاف علي صفيح ساخن بين الشعب المصري و احد الكاتبات الكويتيات

وضافوا اكتر من عنصر للخلاف دا

طب ايه سبب الخلاف؟

وايه الفكرة؟

ومين المتضرر ومين اللي معاه الحق؟

تعالوا معايا فلاش باك سنتين ورا اعزائي القراء

من سنتين يعني سنه 2022 تم الاعلان عن مسلسل كويتي يحمل اسم من (شارع الهرم الي...) مش محتاجه مجهود وذكاء اننا نعرف ان الاسم بيشاور علي المصريين، اصل مفيش حد ربنا اداله اهرامات ومسمي عليها شارع غيرنا للاسف، طب هتقولي جميل ان الشعب الكويتي يعرض صورة للشعب المصري، الكويت بلد شقيقه عربيه اسلاميه واكيد هتلمعنا، بس اسمحلي اقولك انك مع الاسف مع الالم غلطان لان اما تسمع اعلان المسلسل تكتشف ان البطلة مصرية بشتغل رقاصه ومع توالي الاحداث تكتشف انها ابنه غير شرعية لأب كويتي من خادمته المصريه، صدمتك؟!

اني اسف...

اغلب المصريات وقتها اضايقوا وقالوا المسلسل بيشوه سمعتنا وطالبوا بمنعه لكن اتذاع للاسف في الاخر، طبعا البطله باللهجه المصريه والردح والصوت العالي عامله مشاهدات جامدة للمسلسل ولازال المسلسل تريند علي تيك توك.

هتقولي عادي يا بسملة متكبريش الموضوع مره وفلتت منهم مش حوار يعني، اكيد مش قاصدين اللي الكل لاحظه..

طب تعالي معايا يا حنين ورا سنه كمان عام 2021 بـمسلسل (دفعة بيروت) اغلب خناقات المسلسل بين حصه وجميلة، الاتنين اخوات بس حصه من الام الكويتيه وجميلة من الام المصرية، تخيل بقي ام جميلة بتشتغل ايه؟!

الله ينور عليك رقاصه برضو، وخطفت الراجل من م

زوجتة الكويتية برضو.

هتقولي حاسس ان في وجه شبه بين المسلسلين!

هقولك الكاتبة واحده، دا غير ان في مسلسل اتعرض عام 2023 بعنوان (دفعة لندن) مهنيًا واخلاقيًا مش هتكلم علي المسلسل لاني محضرتهوش ولا اعرف عنه حاجه غير ان احداثه بتدور بين لندن والقاهرة حسب م سمعت، يعني يمكن يكون بيشوه سمعتنا وممكن لا، دا موضوع متروك للي تابع المسلسل

(بس ليه مسلسل كويتي يتكلم علي احداث بين لندن والقاهرة معلش؟)

نيجي لاخر اعمال الكاتبة اللي بنتكلم عنها

(زوجة واحده لا تكفى 2024) الكلام علي ايه في المسلسل دا؟!

راجل مصري متزوج من ست كويتيه خدعها ونصب عليها واتجوز عليها 3 منهم واحده مصريه كل اللي بتعمله انها بترقص وتردح عكس طبعا الزوجه الكويتيه الجميلة الرقيقه الذوق الهاديه اللي تتحط علي الجرح يطيب يا عيني، يعني الراجل المصري بتاع ستات ومزواج ونصاب وحرامي ناقص ياكل مال اليتيم ويلعب في نهائي جهنم مع ابو لهب.

طب ايه الفكرة من الخلاف؟

الفكرة ان نساء الشعب المصري حس كده وظن وقد يكون ظن من اللي بينطبق عليهم ان بعض الظن اثم، ان الكاتبة دي قاصده انها تشوه صورة الست المصرية مثلا، لا دا كمان في اخر مسلسل خدت الراجل المصري علي البيعه ومسلمش منها، يعني بالبلدي الشعب المصري كله اتضرب في الخلاط من الكاتبة دي وحس انه اتغفل بس بشياكه كده، وبما اننا شعب مش بيحب يتغفل لا بشياكه ولا بغير شياكه ثاروا عليها، النكته بقي ان الشعب الكويتي متكلمش علي اي مسلسل من دول غير اخر مسلسل ظنًا منهم انه بيشوه سمعه الكويت واهلها (دا أحنا كده يتبني لينا تمثال) وفعلا الممثلين اتحولوا للتحقيق.

هتقولي اتحولوا عشان بيشوهوا سمعة مصر؟!

اقولك لا عشان بيشوهوا سمعة الكويت!

طب مين المتضرر ومين معاه الحق؟!

المتضرر هو اللي بيتم تشويه ابناءه وبناته ويطلعوا راقصين ونصابين وحراميه ومخادعين، لأن اما ناس مصرية رجعت فلاش باك اكتر واكتر لقت ان اغلب المسلسلات الكويتيه بتعمل كده فعلا، المسلسل بيبقي مبني علي شخصية فاسده مصرية، او بتبقي شخصية ثانية بس برضو فاسدة مصرية، اغلب الكُتاب بتوع الكويت شايفين اننا فاسدين ومنتهي صلاحيتنا اصلا.

مين معاه الحق بقي دي يطول فيها الكلام

الشعب الكويتي يقولك ان اللي بيعمل الادوار دي ممثلة او ممثل مصري بالبلدي يعني قبل م تلوموا علينا لوموا ولادكم اللي جايين يطلعوكم كده ويبقي ليكم كامل الحق في الكلام والزعل لو اللي بيعمل الادوار دي ممثلة او ممثل كويتي...

نظريا للاسف عندهم حق، اصل بالعقل متبقاش اختي رايحه لـجارتي تقولها اننا مش لاقين ناكل وازعل اما جارتي تنشر الخبر م الغلط في بيتي اصلا، دا غير ان المسلسلات اللي اتكلمت عنها بينهم ممثلة مشتركه بتقول انها مصرية ابً عن جد، دا غير الممثلين التانين اللي المفروض ليهم قيمة عندنا ورايحين يعملوا كده وحجتهم ان دا من الواقع!!!

وطبعا المصريين معاهم حق انهم يزعلوا ان بيتم تصدير صورة زي دي عنهم وعن بناتهم و ولادهم، وحقهم ياخدوا علي خاطرهم من الكاتبة اللي حالفة انها تشوه اي حاجه مصرية من وجه نظرهم.

طب نعمل ايه؟

ان جيتوا للحق يا شباب علينا جزء من الغلط، أصل لو بصينا كده علي المسلسلات بتاعة اخر فترة عندنا هنا في مصر هنلاقي اغلبها للاسف بيصدر النظرة دي، البنت اللي ساكنه في منطقة شعبي ولابسة عباية وطرحه واول م تطلع تروح الكباريه، والراجل المدمن اللي بيضرب مراته وبنته، والراجل الطماع اللي بيحوز بنته لواحد قده عشان غني، والست اللي بتقف في نص الشارع تعلي صوتها وتسمع اللي م يسمع، اما تكون دي وجة نظرنا احنا عننا عايز وجة نظر الناس التانيه عننا تبقي ازاي؟!

ومتقوليش احنا حرين ودي اعمالنا احنا، للاسف في وقت العالم اصبح اوضة صغيرة وكله مفتوح علي كله لازم تاخد بالك من دا كويس، اغلب الممثلين اللي بيعملوا الادوار دي سواء في مصر او في الخليج بيقولوا دا الواقع، طب م الواقع برضو الام اللي بتترمل بدري وتربي عيالها ويبقوا حاجه تتباهي بيهم، والاب اللي بيتكسر ضهره يوميا عشان يجيب قرش حلال لعياله، والموظف اللي بيقبض يوم 1 ويخلص المرتب يوم 3 ومش بيمد ايده للحرام عشان عنده ضمير صاحي واتربي علي الاخلاق الحميده، والست اللي بتوفر وتدبر لجوزها وبيتها وعيالها، والبنت المحجبه اللي بتلتزم بحجابها قدام اهلها ومن ورا اهلها، والبنت المحتشمه اللي بتبقي مثال للشرف والعزة، وغيره وغيره كتير ليه بناخد الوحش بس ونتكلم عنه وبعدين نزعل لو غيرنا قال علينا وحشين.

للأسف احنا في وقت الناس بتشوفك بنضارتك، متبقاش نضارتك مكسرة وعايز الناس تشوفك سليم، محتاجين نصلح نضارتنا ونرتب بيتنا عشان اما غيرنا يقول عننا حاجه وحشه يبقي دا عيب منه ويحق لنا الكلام ساعتها.......

اخيرًا

طبعًا كامل الاحترام للشعب الكويتي، المقال مش قصده اهانه ليكم، واحترامنا لشعبكم الكريم من مولودكم لـشيخكم، لكن برضو كل اما تزيد الغلاوة يزيد الزعل، وزعل المصريين مش منكم قد م هو من الممثلين والكاتبة (اللي لم يتم ذكر اسمهم)، لكن لو عليكم كـشعب فـأكيد بنحترمكم ونحترم نسائكم ورجالكم واطفالكم،وكـمصريين عارفين ان اغلب الشعب الخليجي بيحبنا وبيحترمنا ويقدرنا، واحنا كمان بنحبهم ونحترمهم ونقدرهم .....