حوار الصحفية روان كامل مع الطالب يوسف محمود حول أهمية الدراسة في المدارس الثانوية الصناعي

الثانوي العام مش هي نهاية المطاف ، اللي لو مدخلتهاش تبقى شخص مش ناجح ومتقدرش تحقق كارير في المجتمع بل ممكن تدخل مدارس تانية زي الثانوى الصناعي والتجاري ، وتحقق منها نجاح كبير زي مهندس مثلا ، ومحاسب .

النهاردة معانا يوسف في حوار خاص هيكلمنا عن أهمية مدارس الثانوي الصناعي ، يوسف طالب بالصف الخامس الثانوي ، حصل على مجموع الثانوي العام ، لكن هو شاف مستقبله أكتر في الثانوي الصناعي، وكانت رغبته أنه يلتحق بها ،فإختار أنه يكمل فيها ، ودخل مدرسة الإسكندرية الفنية المتقدمة. 

وفي بداية حوارنا كلمني عن مدى أهمية المدارس الصناعية من خلال دراستك فيها؟ 

المدارس الصناعي مهمة جدا على مستوى حياتنا العملية ، بنستفيد منها كتير ، كمان ممكن اللي عايز يدخل كلية هندسة و شايف أن الثانوي العام صعبة بالنسبة له ، فممكن من خلال دراسته في الثانوي الصناعي يحقق الحلم ده. 

ايه هى الأقسام والتخصصات اللي موجود في المدرسة ؟

عندنا تخصصات وأقسام كتير زي : قسم سيارات ، قسم ميكانيكا ، قسم كهرباء ،  قسم طاقة شمسية ، قسم تبريد وتكييف .

ايه هو تخصصك ؟

انا قسم كهرباء ، تخصص الآلات .

ازاي تخصصك قدر يفيدك في حياتك العملية؟

أن أكون فيما بعد فني كهرباء ، وممكن أتوظف في شركة تبع تخصصي .

انت شايف ان مدارس الصناعي لا تقل أهمية عن الثانوي العام ؟

طبعا مجموعها زي مجموعة الثانوي العام ويمكن أعلى منها كمان ، وكمان أنا شايف أن بقى مطلوب فنين من جميع الأقسام علشان شركتنا محتاجة عمال فنيين .

كمان أنا شايفة أن المجال المجال مطلوب أكتر صح؟ 

طبعا لأن أكتر من شركة بتكون موجودة وبتطلب فنيين من جميع الأقسام،  كمان يتعرض تدريبات على الطلاب بمرتبات ، وممكن الطالب يتعين معاهم في الشركة .

كلمني عن كل قسم في الكلية بيبقى دراسته عبارة عن أيه ؟ 

أنا مش هعرف اكلمك عن كل حاجة في الأقسام الثانية بالضبط ، ولكن هقدر افيدك بكل حاجة عن القسم بتاعي ، القسم عندنا ليه ورشة كهرباء ، وكتاب شامل 4 مواد كل مادة يدرسها لوحدها وهي مواد أساسية للتخصص ،كمان بندرس عربي ، ولغة انجليزية ، و فيزياء ،ورياضة ،ودين .

هل بتشتغل عملي و بتنزل تدريبات ؟ 

أه بننزل الورشة الخاصة بالقسم بتاعنا ، وبنشتغل بالمعدات.

هل بتنزلوا شركات للتدريب ؟ 

لا ، التدريب كله داخل الورشة. 

ما هى الكليات المتاحة بعد الإنتهاء من الدراسة في المدرسة ؟ 

متاح جميع الكليات .

لازم تجيب كام علشان تقدر تدخل الكلية ؟ 

التنسيق بيتغير كل سنة فمش هقدر اقولك من كام بالظبط ، بس اعتقد على حسب السنوات الماضية من  70% فيما فوق.

هل دخول الكلية بمعادلة ولا بدون معادلة ؟ 

بمعادلة ، لأن إحنا 5 سنين السنتين يعتبروا معهد ، بس حاليا اتلغت ال5 سنوات  وأصبحت 3 بس .

هل ممكن يتوفر لك فرص عمل في الشركات لو محبتش تكمل في الكلية  ؟

ممكن لو مش حابب تكمل تقدم في شركة تابعة للقسم الذي تخصصت فيه.

وفي نهاية حوارنا ايه النصيحة التي توجهها للطلاب التي ترغب في دخول الثانوي الصناعي وفي نفس الوقت قلقانة ؟ 

بالنسبة لي حسب ومن خلال دراستي أنها أسهل من الثانوي العام من خلال الذي أسمعه عنها ، ولكن في الاخر بردو بتعود على حسب رغبة الشخص.