تغطية إيفنت عيد الأم لمركز EIME

كتب :- محمد مسعد , إبتسام حسن , نورهان مجدي

تصوير :- ميسرة محمود

عيد الام ده يوم مميز جدا اتعمل ك تقدير أو تعبير عن الحب و الشكر بشكل بسيط جدا لامهاتنا كلنا تقديرا لتعبهم و حبهم الغير مشروط و كل حاجه بيقدموهالنا بكل حب و من غير انتظار اي مقابل قصاده.

يوم بيحتفل بيه كل الناس مسلمين و مسيحيين عشان يعبروا عن حبهم لشخص مستعد يضحي بكل الدنيا عشانهم شخص بالنسبة ليه سعادتك هي الأولوية الأولى والأخيرة

فالحقيقة دور الأم هوا يُعتبر أهم دور فحياة الشخص وبيفضل دورها موجود حتى بعد غيابها لأن الأم بتضع بذرة بني آدم هيكبر ويكون جزء من المجتمع ونقدر نبص عالموضوع بشكل أوسع وأضق ونلاقي أن علاقة الأم بطفلها هي من أغرب العلاقات اللي فحياتنا علاقة حُب غير مشروطة بتبدأ من لحظة الولادة وتمتد لمدى الحياة علاقة بتربطها رابط اكتر بكتير من مجرد المشاعر بل هي علاقة روحية تامة فالإنسان مهما كبر وأصبح قوي ستظل أمه هي الملجأ والملاذ من كل هموم وشر العالم فهي الشئ الوحيد الذي يربط الشخص وبين طفولته مهما طال العمر .

ويوم الثلاثاء 19 مارس أقام مركز EIME بالكاتدرائية المرقسية في الإسكندرية إيفنت لعيد الأم وقد شُرف فريق العمل بالشبكة بنزول هذا الحدث والقيام بتغطيته و ما يُميز هذا الحدث هي فكرته فكانت كالآتي :-

تم فصل الأمهات عن الأطفال وتم عمل محاضرات توعوية للأمهات عن الذكاءات المتعددة للطفل وتم عمل محاضرات ترفيهية للأطفال تناقش مجالات ذكاء متنوعة لتنشيط مُخيلة وعقل الطفل.

وقد قامت الصحفية إبتسام حسن مديرة إدارة الصحافة بالشبكة بعمل حوار مع كارولين نبيل مسئولة قطاع الطفولة في مركز ايمي، أخصائي نفسي اطفال ومراهقين

س ¹ حابين نعرف تفاصيل اليوم مع الاطفال كانت ماشية ازاي ؟

ج¹ هي كانت عبارة عن ساعة واحدة تم تقسيمها 4 اجزاء، كل جزء منها كان بيتكلم عن نوع ذكاء معين لكل طفل

أولهم كان الذكاء البصري وده عملوا فيه نشاط الاختلاف بين صورتين

النوع الثاني كان الذكاء السمعي وفيه الأطفال بيقلدوا سقفات بعض بنفس النغمة شبه لعبة المرايا بس بالسمع

النوع الثالث كان الذكاء اللغوي و ده كان عبارة عن صورة كرتونية و ازاي يقدروا يعبروا عنها ويتخيلوا

النوع الرابع والاخير كان الذكاء الفني و ده كان عبارة عن رسم شكل هندسي داخله رسمة حيوان

وحاليا الاطفال بتتعلم ازاي تعمل جيفت بسيطة لمامتها وتقدمها ليها فشكل وردة وفيها اسم الام

س² اي الحاجة اللي شايفة انك ورثتيها من مامتك وأثرت فيكي ؟

ج² مامتي كانت دايما عارفة ازاي تواكب سننا وتنزل لينا ف مستوى التفكير سواء واحنا اطفال او مراهقين أو حتى شباب كبار وعارفة كل سنة واحتياجاته فيقال إن ورثتها من مامتي وبحاول انميها عندي اكتر

س³ حبة تدي لأولادك اي ؟

ج³ بحاول اديهم الاحتياجات العاطفية أكثر و ازاي يقدروا يطلبوا ده عادي زي التقدير والحب و أن أكون ظاهرة بين الناس خصوصا أن زمان اهلنا معلموناش ازاي نطلب ده .

ولم يكن ليُقام هذا الحدث بهذا الشكل بدون وجود فريق من المتطوعين الشباب الذين يهدفوا إلى القيام بدورهم على أكمل وجه ولذلك كان من الواجب عمل حوار مع أحد المتطوعين وهو إبرام عماد

س¹ :- هل الايفنت كان قد توقعاتك له ولا حصل العكس ؟

ج¹ كان قد التوقعات واكتر الحمد لله و أولياء الأمور والأطفال مبسوطين جدا خصوصا أولياء الأمور لأنهم استفادوا من الورشة اللي كانت بتناقش ازاي يعرفوا ذكاء طفلهم، وكمان التجهيزات من بداية اليوم فرقت جدا وطورت منهم اكتر .

وإيفنت بهذا الشكل والتنظيم كان لابد لكي يتم إقامته أن تتواجد إدارة قوية قادرة على قيادة عمل بهذا الشكل ولذلك قامت الصحفية نورهان مجدي بعمل حوار مع أحد المديرين بالمركز استاذ مينا رؤوف مدير البحث والتطوير

١. اي اللي الهم المركز بفكره الايفنت النهارده؟

= مركز ايمي للتعليم المستمر هو باين من اسمه أنه عايز طول الوقت الناس تتعلم و تحسن من نفسها علي المستوي العلمي و الثقافي و الاجتماعي و كل المستويات ، فعيد الام مناسبه هامه جدا مينفعش تفوتها من غير ما نشكر الاول الام و كل الامهات علي دورهم اللي بيقوموا بيه مع أطفالهم و تاني حاجه لازم نعلم حاجه للطفل و كمان العيله كلها فجت فكره أنه احنا نعمل احتفاليه لكن تكون مميزه شويه بالتعليم اللي فيها ، الجزء التعليمي بينقسم لجزئين و بيبقي في ورش عمل و اشكال تفاعليه و العاب و بيبقي يوم مبدع.

٢. طيب حضرتك شايف اي حلقه الوصل المفقوده ما بين الأم و ابنها؟

= اللغه اختلفت و الجيل اختلف التربيه اللي الأباء و الأمهات اتربو بيها زمان غير دلوقتي الجيل الطالع و الانفتاح الحصل بسبب الانترنت و التكنولوجيا والحاجات الذي كده ف بقي شويه الاب و الام محتاجين يتعلموا الاول اذاي يتعاملوا مع الجيل ده و طبعا مشاغل الحياه مبتخليش في وقت كافي لحد يتعلم ف البيحاول يطبق التربيه اللي اتربي بيها مع الجيل الجديد بيلاقي أنه مش احسن حاجه ف هي ديه الحلقه المفقوده الاحنا لازم نتعلم ازاي نربي لغه التواصل وازاي نربي عيالنا بالمفاهيم الجديده.

٣. طيب حضرتك شايف الام دورها ممكن يتعوض في الحضانات و دور الرعايه ولا لا؟

=لا خالص بنسبه ١٠٠٪ لايمكن تتعوض دور الأم مهما كانت في الحضانات و النوادي أو في حجات خاصه حتي لو في حد تاني هو البيربي لا طبعا دور الأهل مبيتعوضش خالص في أي نشاط من الانشطه و للأسف البيفتكر أن هو مهما ودي ابنه في حاجه مستواها عالي ده برضو مبيعوضش خالص.

٤. طيب حضرتك شايف اي الهدف الرئيسي الحابب تطلع منه من أيفنت النهارده؟

= الهدف الاول و الرئيسي لو تصدقيني هو أن الناس كلها تبقي مبسوطه و في بسمه علي وش الام و وش الطفل و يبقوا مبسوطين و هما بيقدمو الهدايا و بيتصورو و يقولو شكرا لماما ، والهدف التاني أن الناس تستفاد من محاضره الذكاءات المتعدده و تعرف أن ابنها ذكي بطريقه ما لأن مفيش طفل ربنا خلقه معطاهوش نوع من الذكاء ،وان الطفل يشعر فعلا أن باباه و مامته بيحبوه و مقدرين ذكاءه .

وبنشكر شبكة YEN علي حضورها وتغطيتها المميزة

_ شكرا جدا لحضرتك.

وبكده نكون قدرنا نقولكم كل تفاصيل الإيفنت حقيقي كان يوم مميز بيحتفل بمناسبة مميزة مُقامة لأكتر شخص مميز فالحياة ورسالة شبكة YEN للجمهور أنهم يقضوا كل يوم في حياتهم أنه عيد أم وأنهم ميستانوش يوم عشان يدولها هدية أو عشان يعبروا عن حبهم وأنهم يُدركوا أن مهما اصبح فيه مشاكل بين الابن والأم ستظل هي الملجأ والحماية من كل شخص ومن أي شئ فهي الأم.