ايه هو أصل الفتة ؟

كتبت / روان كامل 

عاملين ايه يا حلوين يارب تكونوا بخير وفي احسن حال ❤

بمناسبة عيد الأضحى كل سنة وانتم طيبين ،انهاردة بقى جبتلكم بمقال عن ايه هو أصل الفتة ومنين جت فكرة الأكلة دي اللي المصريين كلهم مشهورين بها على كل الموائد طوال أيام العيد .

الفتة من الأطعمة الرئيسية والمميزة على كل سفرة مصرية طوال أيام عيد الأضحى المبارك،  وعلشان طعمها لذيذ جدا فهى من الوجبات المفضلة عند كتير من الأشخاص ، وكمان بتساعد على الشعور بالشبع لفترة طويلة ودلوقتي بقى هقولكوا ايه هو أصل الفتة ؟

ايه هو أصل الفتة طبق الفتة المصري ؟

كتير من الأقاويل بتقول ان أصل الفتة بيعود لعصر الفراعنة ، وأن المصريين القدماء اتعودوا انهم يحضروا طبق الفتة، وأطلق عليها هذا الاسم علشان بتطهى من مجموعة فتات الخبز مع قطع اللحمة والأرز، وكانت بتجهز للملوك .

 بعد ما عرفنا ايه هو أصل طبق الفتة وليه اتسمى بالفتة دلوقتي بقى هعرفكوا ايه اللي ربط الأكلة دي بعيد الأضحى المبارك .

ما الذي ربط بين طبق الفتة بعيد الأضحى ومتى ؟

ازدهرت أكلة الفتة بشكل كبير ولافت خلال عصر الفاطميين ، وكمان ازداد ارتباطها بعيد الأضحى علشان الحكام كانوا يذبحون الكثير من الأضاحي في أول أيام العيد وكانوا بيوزعوا أطباق الفتة على الشعب احتفالا بعيد الأضحى. 

وده علشان هي من السهل يتعمل منها كميات كبيرة و بتكاليف قليلة وفي أسرع وقت .وكمان يقال إن الفتة تطورت كثيرا في العصر الفاطمى وأضيف عليها صلصة علشان تعطيها نكهة خاصة ومميزة .

وأضيف الى طبق الفتة الكثير من النكهات مع تطور الزمن التي جعلت لها طعم مميز المذاق لذيذ زي البهارات المختلفة ، وكمان الفتة أصبحت بتتقدم بطرق مختلفة زي طريقة "تورتة الفتة " ، ودي انتشرت في آخر السنوات ، وتنوعت الفتة بين الدول العربية زي فتة الكوارع والشاورما والكتل والباذنجان وغيرها .

وبكدة خلصنا مقال النهاردة يارب يكون عجبكوا ❤.