المقاطعة

بقلم / منار السيد 

ايه ده انت بتشتري بيبسي؟ 

انت مش متابع المقاطعة؟

اكيد كلنا أو على الأقل معظمنا مر بموقف زي ده ، أو كان بيشتري حاجات و لاحظ حد بيشتري منتج من منتجات المقاطعة ، بس في البداية خلينا نفهم هى اية اصلا سياسة المقاطعة ؟ و ازاي ممكن يكون لها تأثير وتساعد في ايه ؟

كتير مننا متبع للمقاطعه و ممتنع تمامًا عن شراء أي منتجات غير عربيه حاليًا بس مش فاهم مفهومها أو هي ازاي ممكن تأثر ، وهل تأثيرها ده قوي و فعال فعلا؟ 

ببساطة سياسة المقاطعة مش حديثه بالمرة أو وليدة اللحظة ، بالعكس العرب أو المصريين أو حتى غير المصريين استخدموها كتير ؛ كتعبير عن رفضهم لشيء أو لفعل غلط بغرض الضغط ؛ لتغيير هذا السلوك المرفوض وبنفس الطريقه بالظبط ده اللي بيحصل دلوقتي و هو أن كلنا بنرفض السلوك العنيف ، و العدوان الغير انساني بالمره اللي بيحصل ضد أشقائنا الفلسطينيين ، و بسبب دعم هذه المنتجات للكيان المحتل قررنا مقاطعتها رغم احتياجنا الشديد لها ، إلا أننا بنسعى باستمرار على إيجاد بدائل عربية ، أو على الأقل لا تدعم هذا الكيان.

و بالنسبة لتأثير المقاطعة فكان لها تأثير قوي جدا في تدمير القوة الاقتصادية للكيان المحتل ومن يعاونه حتى أنهم اتجهوا لسياسة الترغيب من خلال الخصومات و العروض أقل من نص التمن الاصلي لها اللي كان مستحيل أنه يحصل من الأساس ، إلا أنهم اضطروا لذلك بسبب الخسائر الكبيرة التي حصلت لاقتصادهم نتيجة المقاطعة.

في حد ممكن يسأل هل المنتج اللي هشتريه لو امتنعت عن شرائه مش ممكن صاحب المكان يخسر لأنه بالفعل اشتراه ؟

وده الفكر اللي ممكن يكون معظمنا بيفكر به ، بس صاحب المكان مش ممكن يخسر لانه ببساطه مسموح له بإرجاع المنتجات كمرتجعات للشركة التي لم تكن مطلوبة من الأفراد ، و مسموح له أيضًا استبدالها منتجات أخرى. 

سياسة المقاطعة كمان كان لها تأثير إيجابي محليًا ، فهي أصبحت مصدر أساسي لازدهار الشركات المصرية ، وبالتأكيد اقتصاديًا ده هيكون استفادة كبيرة سواء على الجانب الخاص بتشغيل العماله ، و القضاء على ظاهرة البطالة أو على الأقل التقليل منها ، والارتقاء بالمستوى المعيشي للافراد ، و جوانب أخرى كتيره ، وده مش بس لمصر ده هيكون لأي دولة تتبع سياسة المقاطعة .

المقاطعة هي فرصة لقيام دول صناعية منتجة وليست استهلاكية .