الختان للإناث

✍🏻سهيلة فريد الشاطبى

ازيكم عاملين ايه يارب تكونوا بخير دايما وفى احسن حال

النهارده جايه اتكلم معاكم فى موضوع يمكن كتير منكم عانى منه وعانت منه امهاتنا وجدتنا وهو الختان

يلا بينا نعرف يعنى ايه ختان الاناث؟

ختان الاناث يعرف بانه عملية قطع او استئصال متعمد من الاهل بواسطة الداية او دكتور عديم الضمير للاعضاء التناسلية الخارجية للفتاه وكما وصفتها منظمة الصحة العالمية بانها عملية تلحق اضرار للاعضاء التناسلية الانثوية لاسباب غير طبية.

طيب هو الختان موجود من امتى وليه بيتم خضوع البنات له؟

طبعا زى ما كلنا عارفين ان اى حاجه موجوده فى الثقافة المصريه بتكون مأخوذة من الفراعنة وبالتالى فأول من طبق فكرة الختان كانوا القدماء المصريين لانهم كانوا بيستخدموا كطقوس دينية او عقوبة فى زمن الحرب كان يتم الختان على الذكور لحد ما تتطور الامر ووصب لختان الاناث، والغرض من ختان الاناث حسب اعتقاد الاهالى ان ختان الاناث بيحافظ على عذريتها وتهيئتها للزواج، ويعتبر بعض الثقافات طقسا للبلوغ وضرورة للزواج، وتعتقد المجتمعات التى تمارس ختان الاناث ان المهبل يحتاج الى تشذيب وان الختان يحافظ على الصحة.

وطبعا زى ما كلنا عارفين ان الختان بيتم من غير موافقة الفتاه التى تخضع لتلك العملية، ويعتقد خبراء قطاع الصحة ان الختان يعتبر شكل من اشكال العنف ضد المرأة لانه يتم بدون رغبتها وده بيأثر على الفتاه بشكل نفسي وجسدى لانها بتعانى من الم مستمر والتهاب متكرر الذى يمكن ان يصل للعقم، نزيف وخراج ومشاكل فى التبول، اكتئاب واسترجاع ذكريات الماضى، مشاكل اثناء الولاده وحاجات تانية كتيرة.

طيب وايه راى الدين والقانون فى هذه العملية؟

قالت دار الافتاء المصرية ان ختان الاناث محرما شرعيا ومجرما قانونيا ولايجوز الاقدام على هذا الفعل بسبب ثبوت اضرارها الطبية والنفسية والاجتماعية، واكدت نقابة الاطباء رفضها التام لهذه العملية لانها تسبب مضاعفات عضوية وجسدية للاناث واقر قانون العقوبات الصادر ب، قم 58 لسنة 1937والمعدل بالقانون رقم 141لسنة 2021 عقوبات حاسمه تصل الى السجن المشدد لمواجه جريمة ختان الاناث، وذلك لان بعض المسلمين يظنون ان قرار منع ختان الاناث يعد مخالفة للشريعة الاسلامية والحقيقة غير ذلك فالرسول صلى الله عليه وسلم لم يختن بناته ولم يرد نص شرعى يامر المسلمين بذلك وكانت عادة ختان الاناث مباحه حتى قرر الاطباء ان الختان له اضرار خطيرة قد تصل للموت.

الختان مش فرض الختان عادة مغلوطة توارثتها الاجيال والتى جعلت بنات وسيدات كتير بيعانوا لحد دلوقتي، العفه والشرف مش بالختان لكن التربية السليمة على الدين والاخلاق الحميدة من الاهل والحفاظ على بناتهم هى دى اهم حاجه، هى دى العفة والشرف بلاش تعملوا حاجة هتتحاسبوا عليها وغير كدا هتسبب اضرار كتيرة لبناتكم، قربوا منهم احسن واسمعوهم بدل ما تدمروا حياتهم وتندموا باقى العمر.

#لا للختان