التسويف للمبدعين

العقل: قوم خلص الحاجات اللى وراك عشان تبقى رايق يا ابني

النفس: حاضر لما الساعه تيجى خامسة بالظبط هقوم

(بقت خامسة)

النفس: لما تيجي خامسة و نص هقوم او لا لا سابعة دي حاجات سهلة هتخلص بسرعة

كتبت / ميسرة محمود

مين فينا مش بيأجل الشغل أو المسؤوليات اللى وراه و اى حاجة عايز يعملها عشان بس مكسل يقوم دلوقتي و يقول هبتدى كمان شوية أو بكرة

مين فينا نجاحه مش متعطل بسبب التسويف انه هيذاكر او هيعمل شغله او عايز يعمل دايت او يروح مكان أو اياً كان الحاجة اللى تتعمل عشان بس الخطوة الاولى مش عارف ياخدها .

مهما كنت بتسوف هيكون ضميرك من جوا شغال و بيأنبك و انت مش عارف انت ليه مش عارف تقوم و انت عارف انك غلط و لو وصلت لنقطة الاعتراف بالمشكلة يبقى حليت نص المشكلة .

فى حالتين للتسويف :

الحالة الأولى: فى اشخاص بيسوفوا بس لما بيتزنقوا بيطلعوا الحاجة بأحسن ما عندهم هديك مثال :

شخص عليه مهمة فى الشغل انه يعمل حاجة معينة فالشخص قعد يأجل بس طول الفترة دى هو بيفكر يعمل هيطلع الشغل ازاى بشكل جديد أو انه يجى قبل الميعاد بيوم بس هو عارف نفسه انه بيجيله افكار جديدة و هينجز بسرعة أو أنه بيعمل حاجة مفيدة ثانية .

الحالة الثانية : فى اشخاص بقا بيسوفوا من غير سبب عشان لعبة مثلا او عشان يضيعوا وقت على السوشيال ميديا و ييجوا قبل التسليم على طول يعملوه اى حاجة او يخشوا الامتحان وهما مش مستعدين .

فى الحالة الاولى هما أشخاص عارفين نفسهم كويس و مدركين هما هيعملوا ايه بالظبط

فى الحالة الثانية هما يهدرون وقتهم وحياتهم فى اللاشئ

طب إيه الحل ؟

فى حالة الأشخاص المبدعين اللى عارفين هما بيعملوا ايه المفروض يقسموا وقتهم و يقسموا كل يوم المفروض يعملوا اي بالظبط عشان يبقى عندهم وقت راحة و ترفيه و هما مش شايلين هم تماما و ضميرهم مرتاح .

طب ابدأ ازاي ؟

بص يا صديقى الخطوة الاولى بتيجى بطريقتين: يا أما بتيجى فجأة تلاقى نفسك عملتها كده و انت مش عارف ايه اللى حصلك ده ، يا اما هتكون مرتب و واعد نفسك ان خلاص كفاية كده .

بس خد بالك هتقع و تقوم كتير عادى جدا كمل حتى لو عملت مهمة واحدة من اللى انت محددها عادى ده حافز يخليك تكمل بس على الأقل خدت خطوة لأن خطوة بتجيب خطوة لحد ما توصل ان يومك مزدحم و انت مبسوط ده لأن ده نعمة كبيرة فى غيرك لسة مخدش اول خطوة و يتمنى يوصل لده .

الخطوة الأولى دايما صعبة بس لو خدتها انت الكسبان و حياتك هتبقى حياة بمعنى حقيقى.

و فى النهاية هيوصل بيك الحال ل :

العقل : ممكن نقوم نعمل شغلنا عايز انجز النهاردة كتير

انت : طب نص ساعة طيب

العقل : شكلك نسيت نفسك كنت عامل ازاى

انت : لا خلاص هقوم اهو