الأبناء الغير شرعيين للتعليم..

كتبت: بسملة محمود حسن.

عزيزي القارئ / عزيزتي القارئة

يا حبذا لو كنتم طلاب مرحلة ثانوية ويا سلام لو كانت ثانوية فنية، المقال دا ليكم وعشانكم...

في الدراسة الانسان بيكون محدد اهداف له عشان يدخل الكلية اللي ممكن تساعده يحقق حلمه ويوصل للي نفسه فيه (ودي حاجات صعبة جدًا في وجود بعبع الطلاب الا وهو الثانوية العامة) فـ حينها هتلاقي حد بيميل عليك ويقولك م تدخل ثانوي فني أهو أسهل وتضمن جامعة كويسة (ودا كله في الخيال طبعًا) فـ تقع في فخ وقع فيه كتير غيرك وتدخل الثانوي الفني علي اساس انك بتضمن مكانك في الجامعه ولكن هي مسألة وقت و تكتشف الحقيقة....

في أول درس في اللغة العربية، في أول سنة من سنوات التعليم الفني هتلاقي درس بيقولك أهمية التعليم الفني في العالم (كأنه يا عيني بيطبطب عليك ويقولك متخافش التعليم الفني مهم زي الثانوية العامة بالضبط) ويبدأ يتكلم عن الدول التانيه في تطوير التعليم الفني، وقد ايه التعليم الفني مهم في اقتصاد بعض الدول (تحفظ الدرس من هنا وتحس انك أحمد زويل من هنا) و وقتها هتحس بالشكر للي قالك ادخل ثانوي فني، بس أتقل علي رزقك ونشوف هتفضل تشكره لغاية امتي......

بتدخل اخر سنه في التعليم الفني وتبدأ تدور على الجامعات عشان تحدد نفسك تدخل ايه وتذاكر على أساسه (وهنا تاخد الصدمه الاولي ان أقل كلية تدخلها من التعليم الفني محتاجة 90٪ وزيادة، طب Mood on وهي كلية تجارة عادي) وساعتها هتحاول تهدي نفسك وتقول كله مضمون وان هتحاول تشد حيلك والمواد هتتلم (لو فني تجاري فـ مش هنضحك علي بعض، في مادة اسمها المحاسبة المالية انا وانت عارفين كويس انك عايز تذاكرها قبل الامتحان بـ سنتين) تفضل تذاكر وتجتهد عشان تجيب المجموع اللي يدخلك الكلية......

تمتحن وتخلص الامتحانات وتاخد الصدمه الثانيه في وشك، وهي انك لازم تعمل معادلة من أربع مواد عشان تدخل الجامعة (م خلاص يا جامعة دا انتِ قمة أوي) ولازم تجيب علي الاقل 15 درجة في كل مادة (ملحوظة العظمي أصلا في المواد دي 20) وهنا تبتدي تحس انك اتضحك عليك من 3 سنين......

تبدأ مرحلة التنسيق اللي هي أصلا بتكون بعد تنسيق الثانوي بـ فترة مستريحة (بعد ما يريحوا طلاب الثانوي العام يفتكروا ان في ناس تانيه عايزة تنسق ويفتح باب التنسيق لمدة أسبوع أو أقل) فـ تشوف انت الجامعات المتاحة لك وتلاقي أن أقل جامعة ليك طالعة فوق في الدرجات اللي بتقبلها وحتى لو عملت معادلة مش مضمون انك تدخلها.....

بيبدأ طالب الفني هنا يحس انه منبوذ من الوزارة اللي المفروض تأمن دخوله الجامعة زي ما بتأمن دخول طالب العام، وكمان لما طالب العام يدخل الكلية اللي بيتمني يدخلها طالب الفني (وفي الغالب طلاب العام بيبقوا رافضين وغير قابلين يدخلوا كلية زي كلية تجارة أو زراعة اللي اصلا حلم طلاب الثانوي الزراعي والتجاري، ويقولوا دي كليات ملهاش و احنا اتظلمنا أننا دخلنا كلية درجة رابعة زي دي، في حين طالب الفني بيتمني كرسي جمب عم عبده بتاع الامن فيها) وقتها طالب الفني بيتمني انه مكنش سمع كلام اللي نصحه في الاول بس لا يفيد البكاء الآن ضاع 3 سنين من العمر.....

من وجهة نظر تانيه الأسلوب المتبع غير صحيح، يعني طالب يدرس كيمياء وفيزياء 3 سنين تدخله جامعة يدرس فيها الضرائب ومحاسبة مالية وإدارة مخازن واللي بالفعل دارس الحاجات دي تقوله معلش ملكش مكان فى حاجه انت اصلا ادري بيها من طالب العام؟!

وفي ناس تقولك طلاب الفني كده كده مش عايزين يكملوا تعليم، فـ بيدخلوا الفني بحيث يبقى معاهم شهادة اعلى من الاعدادية وخلاص، دا غير الاهالي اللي بتكسل تدخل بناتها ثانوي عام وتدخلهم ثانوي فني والسلام، والبنات اللي بتاخد الفني حجة للهروب من المساعدة في اعمال البيت، دا غير نظرة المجتمع ككل لـ طلاب التعليم الفني انهم اقل م اي طالب تاني.

من أكتر الملفات الحساسة في مصر هو ملف التعليم عمومًا، سواء طالب ثانوي عام أو فنى محدش عاجبة الأسلوب، أبناء الثانوي العام بيحسوا بالظلم دايمًا في النتيجة بس اهو احسن من غيرهم وبيلاقوا جامعة يدخلوها حتى لو التقدير 58٪ أو حتي معهد كويس (اللي كمان طالب الفني محروم منه ومحدد نسبة بسيطة جدًا من مقاعد المعهد له)، وطالب الفني اللي بيحس انه ضيع 3 سنين من عمره على الفاضي ومفيش أي عائد عليه لا دخل جامعة ولا حتى معهد ووقتها يبدأ يقارن.....

طالب الفني بيدرس حوالي 13 مادة كل مادة حرفيًا بتسلمه للتانيه خلصان (كله ضرب ضرب Mood on) كل مادة تؤهله أكثر من طالب العام لدخول الكلية المتاحة له....

تعبير قد يكون ثقيل على مسامع الاشخاص الا ان فعلاً الوزارة بتعامل طلاب الثانوي الفني انهم ابناء غير شرعيين لها، زي المسلسلات بالضبط الراجل بيعامل ابنه اللي والدته غنية وبنت حسب ونسب أحسن من ابنه اللي ولدته بسيطة وعلى قد حالها (ودا اللي بيحصل فعلاً الوزارة بتسعي انها تريح طلاب الثانوي العام وبعدين بيفتكروا طلاب الثانوي الفني +في تنسيق الجامعات مش بيدوا العيش لخبازه، اللي دارس كيمياء مؤهل انه يدخل جامعة يدرس فيها ضرايب او مبادئ الزراعة أكتر من اللي دارسهم بالفعل) وبعدين نقول ليه الطلاب مش بيحضروا....!!

طالب العام بيشوف الكليات دي درجة رابعة، وطالب الفني بيشوف الكليات دي درجة أولي وحلم بالنسبة له، ليه الوزارة متوفقش الآراء؟!

ليه الوزارة مصممة تدي العيش للميكانيكي، وتدي العربية للنجار، والدولاب للخباز؟!

أول علاقة رسمية بين المواطن والجهات الحكومية بتكون في المدرسة، فـأن كانت أول علاقة رسمية بتخلي الانسان يحس انه منبوذ وغير مرحب بيه فـيا مرحبًا بـكره المجتمع والشعور بالظلم وفساد النظام وفكرة الكوسة والمحسوبية وان اللي بيحلم بحاجه مش بيعرف يحققها في البلد دي، ودي افكار كلنا عارفين نتيجتها بتكون ازاي ويترتب عليها ايه...

إن أصلحت الوزارة علاقتها بالطلاب أصلحت مجتمع كامل، وإن لم تصلح الوزارة علاقتها بالطلاب أفسدت مجتمع كامل....

واخيرًا...

اما ان وزير التربية والتعليم والتعليم الفني يعترف بأبنائه طلاب الثانوي الفني ويعطيهم امتيازات أو تنفصل الوزارتين ويكون هناك وزارة خاصة للتعليم الفني ان كان الوزير لا يستطيع التوفيق بين الأمرين.....

وعلى الوزارة المسؤولة عن تنسيق الجامعات إنصاف طلاب التعليم الفني و إيجاد أراضي محايدة ترضي طلاب الثانوي الفني الذين لا يملكون سوي جامعات ومعاهد لا تتخطى عدد 10 أصابع وطلاب الثانوي العام الذين يملكون كل ما وقع تحت قبة التعليم العالي........

وبعد سؤال طلاب العلمي السابقين والحاليين عن الأسلوب المتبع والصعوبات التي تواجههم كانت دي آرائهم:

ر. م

صعوبة دخول الجامعات الحكومي ليه الطالب بيكون مذاكر ومجتهد ولازم عشان يدخل هندسة لازم معادلة بتكون منهج ثانوي عام واحنا بندرس أساسيات الكلية من الرسم والتصاميم وكدة ودايما الجامعات بتكون محدودة اووي ليه دايما متاح عندنا المعاهد الخاصة الي اغلبها بيكون مش معتمد.

م. ه

اكتبي إن المفروض الأولوية تكون لينا احنا ف كلية التجارة وأن التنسيق المفروض ينزل على الأقل يبقى من ٩٠ مش الأرقام المهولة اللي بنسمعها دى وحرام بجد اللي يبقى جايب ٧٠ زيه زي اللي جايب ٩٠ و٩٤ كمان والتنين يعملو المعادله ليه ندفع بال ٥٠٠٠ تاني ف معادلة لما ممكن نتعامل زي الثانويه العامه واللي يجيب درجه يبقى ليها كليه او معهد والموضوع يقف على كدا ليه يتعبونا بجد.

أ. أ

خليهم يخففو التنسيق شويه احنا مش عباقره يعني عشان نجيب 99.9 ٪.

م. ش

قبل النظام الجديد كان تمام لكن بعد النظام الجديد مرشحش اى حد تماما انه يقدم ف التعليم الصناعي، أول حاجة فرصته لدخول الهندسة بقت شبه مستحيلة والدليل على كدة ان المدرسة بقالها حوالى 10سنين محدش بيدخل هندسة وده بسبب سوء حظ الطلبة فى المدرسين اللى بيجوا من برة بيحط درجات عشوائية لانهم واخدين فكرة سيئة عن الطلبة وانهم فاشلين والكلام ده ف بيظلم الكل ثانيا التنسيق بقا ف السما واقل معهد هندسة خاص بقى من 95 يعنى قدامك 50 درجة فقط ممكن مدرس بخط القلم يضيع كل ده فى العملى. لان العملى عندنا 480 ف التعليم الفنى بقى سئ. من حيث المدرسين ومن حيث النظام ولو رجع بيا الزمن كنت دخلت ثانوى عام لوجود فرص أكتر وأفضل.

…

الاهتمام بالأجهزة اللي في الورش والمعامل بدل ماهي متربه و واقفه بقالها سنين والله اكيد طبعا نسبة ال %10 من الكليات والمعاهد لازم تزيد، و ليه ميبقاش في كلية هندسة في التنسيق حتى لو هتاخد من 98 او 99% بس نشجع الطالب يدخل تعليم فني احنا لو بصينا في التنسيق كلها معاهد عليا بس للاسف مهما هنتكلم الدولة مش بتستجيب وبرضو حتة التنسيق يعني النتيجه تظهر وفرحانين ونستني لسه المرحله التالته بعد ثانوى عام بنلم الفتافيت اللي باقيه من الكليات ولو جيت حسبت هتلاقي 3 او 4 كليات في التنسيق تعليم صناعي وتربيه وتكنولوجيا.

الـمُعلمة ه

بخصوص الطلاب اكتبى عن الفئة اللي جاية تضيع وقت مش جاية تتعلم ولا حاطة التعليم في دماغها، هي جايه هربانه من البيت وشغل البيت فقط، وكمان عن الفئة المظلومة من أهلهم أن مستواهم التعليمي ممتاز لكن الاهل رافضين ان بناتهم يكملوا تعليم بعد الدبلوم بحجة الجواز والمصاريف، وكمان عن اخلاق وسلوكيات بعض البنات واللي بيحصل منهم وان قد ايه السيئة بتعم وان بنات كتير كانت اخلاقها كويسة ولكن اكتسبت صفات مش كويسة وده أثر عليها وعلى غيرها وكان السبب في انها اتحرمت حتى من شهادة الدبلوم بسبب ان اهلها سحبوا الملف بتاعها.