اصل لهجة عربيه ♡
- Mohamed Mosaad
- Sep 13, 2023
- 2 min read
كتبت: بسملة محمود حسن
_ تِح يعم بدل ما أنت عامل زي البعبع كده!!
يا صباح الهيروغليفي.
_انتِ تاني؟!!!!
مفاجأة.
_ هيروغليفي ايه بقي اللي بتصبحي بيه؟!
الجمله اللي قولتها أنت دلوقتي هيروغليفي.
_مش الهيروغليفية دي بتاعة الفراعنة؟!
هما بعينهم.
_لأ من نفسي بقي هجيب الشاي واجي وراكِ كده.
_____________________
نُبذه بسيطه لطيفة عن اللغة، الهيروغليفية اللغة المصرية القديمة، المعروفة مجازا بالهيروغليفية، وإن كانت الهيروغليفية أحد الخطوط وليست لغة، وأصبحت المفردات المصرية القديمة ضمن لهجتنا العامية التي يتوارثها الأجيال.
_لحظة، لحظة، انتِ عايزة تقنعيني فعلًا اننا بنتكلم اللغة المصرية القديمة؟!
واقنعك ليه بـحاجه واقعيه اصلا!!
_الفراعنه نفسهم اصلا كانوا بيستخدموها ازاي؟
اللغة الهيروغليفية هي كلمات قديمة كان يستخدمها الفراعنة في مصر القديمة، حيث ظهرت لأول مرة في مخطوط رسمي ما بين عامي 3300 قبل الميلاد و3200 قبل الميلاد، وسميت بالهيروغليفية لأنها تعني بالإغريقية "نقش مقدس"، وفيها استخدمت الرموز لتعبر عن الأصوات.
وفي عصر الفراعنة استخدمت الهيروغليفية لنقش وزخرفة النصوص الدينية، وظلت لغة كتابة متداولة حتى القرن الرابع الميلادي، حين تم فك رموزها بمساعدة الكشف الأثري لحجر رشيد على يد الفرنسي شامبليون.
_ايوة عارف الحكايه دي، زي ايه بقي الكلمات دي؟!
بص يا سيدي، اولا كلمة" تِح "اللي قولتها وهي متداوله في الصعيد اكتر بمعني شد او اسحب واصلها" اتح" في الهيروغليفي، وكلمة "بعبع" دا اسم عفريت مصري كان بيستخدم في تخويف الاطفال واصله في القبطيه "بوبو".
_شكله الموضوع هيطلع بجد!!
طب تعرف ان طفولتنا اصلا هيروغليفية بحت؟!
_ ازاي بقي؟!
كلمه "مَم" اللي هي بتقولها الام لابنها كتسهيل لكلمة الاكل او عايز اكل للطفل اللي لسه بيتعلم يتكلم، هي في الهيروغليفي طعام؟!
و "إمبو" تعني الشرب، والجلمة المشهورة "تاتا خطي العتبه" في الهيروغليفي "تاتا" تعني امشِ.
كلمة "نونو" اصلا هيروغليفي معناها الوليد الصغير.
وجلمة نهاية كل حدوتة "توته توته وخلصت الحدوتة حلوه ولا ملتوته"
ذُكر في كتاب "اللهجة العامية وجذورها المصرية " أن هذه العبارة بمعانيها وألفاظها كانت تستخدم من قديم الأزل منذ أيام القدماء المصريين بنفس المعنى ، فلفظ "توتة" يعنى فى اللغة القبطية (نهاية أو حافة)، وهى مأخوذة من الكلمة المصرية القديمة بمعنى (صنع أو أكتمل) فكانت الأم تردد هذه العبارة وتكررها بالهيروغليفية " توتة توتة " وتعنى بالعربية "خلصت"، أما "ملتوتة" فتحمل نفس المعنى بإضافة "ما" التى تدل على عدم النهاية، وهي بمعني ان الطفل عايز سرد حدوتة تانيه.
_دا طلع بجد بقي.
طبعًا يبني مش احفادهم نعمل اللي احنا عايزين نعمله ونقول اللي عايزين نقوله، بنربي اولادنا بمصطلحات هيروغليفي، وبنهزر ونضحك ونوبخ بالهيروغليفي كمان.
_التربيه وعرفناها، لكن الهزار والتوبيخ ازاي بقي؟!
عندك مثلا كلمة "طنش" يعني لم يستجيب.
كلمة "خُم" تعني خدعة، زي اما بيجي صحاب سوا و واحد يكسب التاني يقوله انت بتخم عشان يداري خيبته.
والشيء بالشيء يذكر كلمة "مكحكح" وتعني العجوز المشيب وساعات بتتقال علي شاب عشريني مش قادر يصلب طوله عادي برضو.
كلمة "هوسه ودوشه" تعني الضجيج بصوت عالٍ.
_دا احنا بنتكلم لغات بقي واحنا منعرفش.
دا حقيقي بنتكلم اكتر من لغة واكتر من كلمة محرفينها من لغتها الاصليه للنطق العربي.
_زي ايه اللغات؟!
لأ كباية الشاي بقي.
Comments