ازاي تعمل خطة تسويقية في 7 خطوات !

كتبت /روان كامل 

عاملين ايه يا حلوين يارب تكونوا بخير وفي احسن حال .

كتير مننا لما بيجي يبدأ مشروع مش بيحط خطة تسويقية واضحة ، ومعظمهم بيكون من أصحاب المشاريع الصغيرة لأنهم بيعتقدوا أن الخطة التسويقية مش مهمة ومش هتفيدهم في حاجة ، ولكن في الحقيقة الخطة التسويقية مهمة جدا لأي بيزنس سواء كان كبير أو صغير ، علشان هي اللي بتوضح مسار الشركة أو المشروع وكمان بنعرف من خلالها إليه هي نقاط القوة والضعف ومش بس كدة دي من خلالها بنقدر نعرف ايه هي الوسائل اللي هتساعدك في نجاح مشروعك. 

وعلشان الخطة التسويقية مهمة جدا لأي بيزنس، فأنا النهاردة هعرفكم ازاى نعمل خطة تسويقية وفي 7 خطوات بس .

اول حاجة حدد طبيعة البيزنس 

اول حاجة هتخطر على بالنا دلوقتي ازاي احدد طبيعة البيزنس  ؟ يلا تعالوا معايا وانا هقولكوا ازاى .

حدد طبيعة البيزنس يعني قبل ما تبدأ الخطة التسويقية لازم يكون عندك خلفية كويسة عن البزنس اللي هتسوقله لأن لما تعرف كل حاجة كويس هتقدر تسوق للمشروع بشكل كويس لكن لو ماعندكش حصيلة معلومات كويسة عن الحاجة اللي هتسوقلها اكيد مش هتعرف تسوقلها، ولازم يكون متوفر عندك معلومات أساسية زي :

 ايه هى الخدمات اللي بيوفرها البيزنس ؟ 

هل  البيزنس متواجد على الأرض ولا أونلاين بس ولا الاتنين ؟

هل الشركة اللي بتسوقلها يمتلكها شخص واحد ولا مجموعة أشخاص؟

ايه هي نقاط القوة والضعف في البيزنس ؟

تاني حاجة هي إن أنت تحدد السوق المستهدف "Target Market "

والنقطة دي من النقاط المهمة جدا وانت بتعمل خطة تسويقية وهي انك تحدد عملائك المستهدفين اللي محتاجين الخدمة أو المنتج بتاعك ، ومينفعش تستهدف الناس كلهم لأن مش كل الناس هينفعهم المنتج علشان احتياجاتهم  بتختلف حسب جنسهم وأعمارهم ومستواهم. 

استهداف العملاء بيكون على أساس:

سنهم.

جنسهم.

وظيفتهم.

اهتماماتهم.

سلوكهم الرائي.

تلات حاجة عندنا وهي تحديد المنافسين 

انك تحدد المنافسين بتوعك ده ضروري جدا وكمان لازم تعرف كل حاجة عنهم ، زي ايه مثلا ؟  زي انك تعرف الخدمات اللي بيقدموها ، وطريقة تسويقهم للمنتجات ، و أسعار منتجاتهم ، وهل هما متواجدين أونلاين ولا لأ ؟ وبعد ما تعرف كل ده ، لازم تقدم ميزة تتميز بيها عن المنافسين ، ولو ماتقدرش انك تتميز عنهم ، فلازم على الاقل تبقى في نفس مستوى الخدمة اللي بيقدموها مش أقل منهم .

رابع حاجة انك تحدد نوع التسويق 

والخطوة دي هي اللي هتحدد فيها نوع التسويق هل هيبقى أونلاين ولا أوفلاين ؟ ولو هيتم التسويق أونلاين ففي الحالة دي هنحدد هيكون التواجد على انهى قناة تسويقية : فيسبوك ، ولا X (تويتر سابقا ) ، ولا يوتيوب ، ولا انستجرام …وغيرهم .

خامس حاجة هي تحديد الأهداف

وفي الخطوة دي بتحدد الأهداف اللي عايزين نوصلها زي :

الناس تعرف البيزنس بتاعك " Brand awareness" .

زيادة المبيعات .

تحويل العملاء إلى موقعك الإلكتروني. 

وكمان في الخطوة دي وانت بتحدد أهدافك حدد أهداف منطقية وسهلة التحقيق .

سادس حاجة هي تحديد كيفية تحقيق الأهداف ! "Outline Strategies"

وبعد ما حددت الأهداف جه الوقت لتحقيقها ، ففي المرحلة دي بتوضح الخطوات اللي هيتم  استخدامها لتحقيق الأهداف، زي مثلا انا من ضمن أهداف أن ازود عدد المتابعين إلى مليون شخص ، أوضح الخطوات اللي هعملها عشان احقق ده ، وكمان هعمل حملات إعلامية مدفوعة بهدف زيادة عدد المتابعين .

سابع حاجة والاخيرة هي تحديد الميزانية 

ضروري جدا انك تحدد الميزانية اللي هيتم صرفها على التسويق ، وكمان مهم انك تحدد كل حاجة بالتفصيل ، وممكن جدا يحصل أي تغيير في الميزانية المحددة سواء بالزيادة أو النقصان .

وبكدة اكون خلصت مقال النهاردة يارب اكون قدرت افدكم ❤.