ادخل البيت من بابه

كتبت / روان كامل 

ازيكوا عاملين ايه ❤

النهاردة حابة اكلمكم عن موضوع انتشر بشكل كبير الأيام دي هو موضوع الارتباط بدون علم الأهل،  البنت أو الولد لما بيعملوا حاجة زي كدة مش بيفكروا ازاي الموضوع ده بيشكل خطر كبير عليهم وعلى سمعتهم ومش بس كدة وعلى أهاليهم كمان ، وخصوصا بالنسبة للبنات الموضوع بيشكل خطورة أكبر عليهم .

(إذا أنت تحبها لا تضرها )

دلوقتي انت اعجبت ببنت اول حاجة لازم تعملها علشان تبدأ العلاقة بشكل سليم وناجح أنك تكلم أهلها مينفعش تبدأ معها العلاقة بدون علم أهلها. 

انت كبنت مينفعش تسمحي لأى حد يبدأ معاكي علاقة بالشكل ده ؛لأنك كدة بتشكيل خطورة على سمعتك وسمعة أهلك فكري كدة أن أهلك اللي دايما بيستنوا انك تعملي حاجة ولو حتى صغيرة علشان يفتخروا بيكي ودايما واثقين فيك، لو عرفوا حاجة زي كدة هيبقى موقفهم ايه وشكلهم ازاى قدام الناس .

وانت كولد ازاي لو العلاقة استمرت بينكوا هتبقى واثق فيها ، لان البنت دي وافقتك في البداية على بداية العلاقة بشكل غلط ، زي ما عرفت تكلمك بدون علم أهلها ، اتأكد أنها هتقدر تخونك وتخبي عليك حاجات كتير زي ما كان عندها القدرة انها تخبي علي أهلها وتخونهم .

وانت كبنت ازاي توافقي انك تكلمي ولد وتثقي فيه ، شجعك على عمل حاجة غلط بدون علم اهلك ، ممكن في أى يوم من الأيام يستغل ده ضدك ، وكمان لازم تفكري كويس انه ممكن يكون بيكلمك ويخليكي تتعلقي به وهو الموضوع بالنسبة له مجرد تسلية بيستخدمك كأداة بيتسلى بيها .

كمان الموضوع ده بيشكل خطر كبير على البنات خصوصا ، لان ممكن الولد يستغلها بأي شكل من الأشكال ويتسبب لها في أذى يفضل ملازم لها طول عمرها ومستحيل تنساه ، وفي قضايا كتير زي دي في مجتمعنا بنشوفها كل يوم وبنسمع عنها ، ونشوف قد إيه البنت وأهلها بيتأذوا . 

كل اللي عاوزة اوصله ، أن لو هو بيحبك أول حاجة هيعملها أنه يدخل البيت من بابه ومستحيل يضرك ويشجعك انك تعملي حاجة غلط ، وأنت لازم تختار اللي تقدر تثق فيها اللي مستحيل توافقك على حاجة غلط ، واتقوا الله في آبائكم وأمهاتكم اللي دايما لازم تكونوا مصدر فخر ليهم .

يارب اكون قدرت افدكم ❤