إزاي تشوف الحقيقة؟

كتبت: نورهان مسعد

إدراك الحقيقة و النظرة الصحيحة للحياة هي عملية صعبة و معقدة بتتأثر بتحيزاتنا الشخصية و تجاربنا السابقة.

لو انت شايف إن الحياة بقت صعبة و مفيهاش اي حاجة حلوة ، ف الاكيد إن في حاجة حصلتلك هي اللي خليتك تشوف الدنيا كدا بس الحلو في الموضوع انك تقدر تتحكم في الحاجة دي و تغير النظرة التشاؤمية اللي منكدة عليك حياتك؛ الحاجة دي هي " التحيزات السلبية " هي اللي بتشوه العدسة اللي بنشوف بيها مواقف معينة يعني بتخلينا دايما نتوقع الأسوء ، التحيزات السلبية هي اللي بتخلينا نحكم على أشخاص من غير ما نتعامل معاهم ، وهي اللي بتأثر على العلاقات و التفاعلات الاجتماعية .

التحيزات السلبية كمان بتعمل نوع من أنواع القيود المعرفية ، بمعنى أن التحيز السلبي بيقلل من قدرتنا على استيعاب و تقبل وجهات النظر المختلفة.

بإختصار بتخلينا ما نشوفش اي إيجابيات في اي حاجة حتى في أبسط الامور، يعني لو حد سألك عامل ايه انهاردة اول حاجة هتفتكرها هتكون حاجة وحشة حصلت في يومك، وحتى في وقت ما تكون وصلت لحاجة كبيرة بدل ما تفرح بنجاحك هتفتكر كل حاجة وحشة حصلتلك لحد ما وصلت ف بتبقى مش عارف تفرح بنجاحك.

السؤال الاهم ازاي اقدر اتحكم في التحيزات السلبية و الأفكار التشاؤمية و نشوف العالم على حقيقته الحلو و الوحش بدون مبالغة؟!

١/ الاعتراف بالتحيزات السلبية: الخطوة الأولى لتغيير النظرة السلبية للحياة هي الاعتراف اننا عندنا تحيزات سلبية، ولازم ندرك أن النظرة دي نقدر نغيرها عادي .

٢/ جرب حاجات جديدة: من غير ما يكون فشلك فيها معناه نهاية شغلك أو حاجة تسببلك إحباط ، و كل ما تجرب حاجة جديدة سجل إحساسك كل مرة لأن بالطريقة دي بتدرب عقلك أنه يكون عملي اكتر و يشوف المواقف على حقيقتها .

٣/ تغيير الرؤية المستقبلية: لازم نعزز الرؤية المستقبلية و نركز على الأهداف و التطلعات الإيجابية بدل ما نركز على العوائق و المشاكل ، ودايما خلي اي تحديات بتمر بيها انها تكون فرصة عشان تتطور .

٤/ تقليل السوشيال ميديا: خليك عارف ان اهتمامك بفلوس كتير اوي و كل منصات السوشيال ميديا بتتخانق عليه لأن كل ما قضيت وقت اكتر كل ما ظهرتلك اعلانات اكتر و كل ما بتكون فرصة أكبر أنهم يوجهوا تفكيرك و يتحكموا في رأيك.

وفي النهاية التحيزات السلبية ممكن تخبي علينا الحقيقة لأننا تعودنا عليها وبقت هي طريقة تفكيرنا، و بتخلي عندنا رعب و خوف من بكرة اكيد في حاجات وحشة بتحصل لكن دي سُنة الحياة فيها الحلو و فيها الوحش . وخليك عارف ان تغيير النظرة السلبية محتاجة وقت و صبر يعني مش في يوم و ليلة هتلاقي نظرتك اتغيرت.

احمد ربنا دايما على النعم اللي مديهالك وخلي عندك تقدير للحاجات الجميلة في حياتنا ❤️