أصل حكاية كحك العيد

-هانت كلها ساعتين و نصلى العيد و نطلع ناكل الكحك بقا و نسقيه فى الشاى

= نفسى اعرف مين اللى اخترع فكرة الكحك فى العيد ده و ان الناس تبقى مستنياه كده

- اى ده انت متعرفش ان ده من أيام الفراعنة ؟

= فراعنة ؟؟ للدرجادي انا كنت فاكره حاجة من العصر الحديث

-لا انت فايتك كتير اوى هات كوباية الشاى باللبن و تعالى احكيلك أصل الحكاية .

كتبت / ميسرة محمود

أول ظهور للكحك متعارف عندنا كان على جدار معابد المصريين القدماء فى الأقصر من 5000 سنة ، منقوش عليها اشخاص و هما بيخبزوا الكحك و فى رسومات على مقبرة الوزير تى عليها ستات شايلة سلة كحك فوق راسها

= أنا عرفت أمك جابت العادة انها تنزلنا و تمرمطنا بالكحك فوق راسنا منين

-أيوة اجدادك الفراعنة السبب و لو سمحت خليكي اكمل

كمان لقوا وصفة كحك منقوشة على جدران مقبرة رخ مى رع من الأسرة ال 18 ، الوصفة كانت سمنة و عسل بيتخلطوا مع بعض و بعدين نحط عليهم دقيق و نفضل نعجن العجينة لحد ما تمسك نفسها و بعدها تتشكل فى ألواح و تتخبز فى الفرن و كان يُقال أنه بيتحشى بالتمر و التين و يزينوه بتحابيش مختلفة زى الزبيب و النبق (هحطلك صورة النبق تحت) و الكحك كان شئ أساسى و مميز جدا لدرجة أن الخبازين بيصنعوه فى القصور و يعملوا منه أشكال مختلفة زى المدور و الحلزونى و كان بيتقدم فى الحفلات.

و المصريون القدماء كان ارتباطهم بالكحك كان ارتباط دينى عشان كده اختاروله شكل "قرص الشمس المدور" و كمان نقشوا عليه خطوط مستقيمة بتعبر عن اتون رع (إله الشمس) عندهم .

و فضل الكحك مكمل سنين لحد عصر "الدولة الفاطمية"

اللى بدأوا يربطوا الكحك بعيد الفطر ، لأن الفاطميين كانوا بيهتموا بالأعياد الدينية و بيزودوا أجواء الفرحة و البهجة عشان يقربوا من المصريين لدرجة أنهم بيخصصوا 20 ألف دينار فى السنة عشان الكحك بس و كمان عملوله مخابز مخصوصة فى الدولة سُميت "بدار الفطرة" وكان بيتوزع على الفقراء و المحتاجين على موائد مخصوصة ليهم ، و يُقال أن الخليفة كان بيمشى فى موكب ضخم و يوزع على الفقراء بنفسه أو يقف فى الشباك و يفتح أبواب قصره للشعب يخشوا ياكلوا منه لحد ما يشبعوا .

بعد كده جه "الأيوبيين " و حاولوا يمحوا كل حاجة عملها الفاطميين لكن طبعا فشلوا انهم يمحوا الكحك من المصريين و زى ما أنت شايف الكحك مكمل معانا ل 2024 اهو، و بعد ما صناعة الكحك كانت الدولة هى المتحكمة فيها لسنين طويلة اتنقلت لكل بيت من بيوت الشعب.

و فى عهد "المماليك و العتمانيين" الحكام اهتموا بالكحك و كانوا بيوزعوه على المصليين و و طلبة المدارس و كانوا بيستخدموه صدقة للفقراء و المحتاجين .

-و بس يا سيدى دى كل حكاية الكحك

= أجدادنا الفراعنة دول عظمة أوى

-يلا نصلى العيد بقا و نطلع ناكله